Misukol sa polis, patay

Misukol sa polis, patay

Usa ka drayber sa habalhabal namatay human nisukol sa kapulisan nga nitubag sa alarma sa iyang pagpabuto og pusil sa Purok Mangga, Brgy. Panangban, lungsod sa Compostela, amihanang Sugbo alas 7:30 sa gabii sa Miyerkules, Hulyo 3, 2024.

Ang tinubdan sa Superbalita Cebu niila sa namatay nga si Joel Niño Castro Pareha, 34, ulitawo, drug surrenderer, taga Purok Kamansi, Brgy. Panangban.

Si Police Captain Lino Tryss Galvan, hepe sa Compostela Police Station, nibutyag nga nakadawat sila og alarma bahin sa pagpabuto sa armas sa gym sa barangay.

Si Panangban Brgy. Kapitan Alex Castro maoy nangayo’g police assistance bahin sa maong alarma.

Matod pa, walay hinungdan nga nagpasalba sa iyang armas ang suspek ug gibadlong sa kapitan.

“Gibadlong ni Kap kay dili maayo gibuhat, maalarmahan. Nitubag daw ning (suspek) nga paalarmahahi lang sa polis,” dugang ni Galvan.

Nanawag ang barangay kapitan sa kapulisan, nga dali’ng nakaresponde ug naabtan ang suspek nga nagpahipi sa kilid sa barangay hall.

Matod pa, gipaabot niya ang mga polis human nasayod nga siya gipaalarmahan.

Nahitabo ang negusasyon tali usa ka higala sa suspek nga nitambag niya, apan nagsige na kini’g tion sa iyang armas ngadto sa kapulisan.

Sumala sa kapulisan, nisamot sa pag-wild ang suspek hangtod nga gipusil niya ang mga polis nga nakapasalipod sa patrol car atol sa negosasyon.

Naigo ang side mirror sa patrol car sa pagpamusil ug nibawos ang mga polis sa pagpusil. Naigo ang suspek sa kuto-kuto.

Dihang na neutralize na, gidali siya sa pagdala nila sa tambalanan apan gideklarar sa doktor nga patay na sa paghiabot.

Sumala ni Galvan, kalit lang nag-wild ang suspek ug wala pa masuta kon unsay hinungdan kon nganong nagpabuto.

Nasuta sa kapulisan nga karon unta, Hulyo 5, ang suspek gikatakda nga isulod sa iyang pamilya sa rehabilitation center.

Narekuber sa kapulisan ang usa ka paltik .38 caliber revolver nga dunay mga bala ug mga kabhang. / GPL / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph