Inay nga motahan sa kaugalingon, nakigpinusilay ngadto sa polis ang usa ka suspek nga nag-atubang og kasong frustrated homicide sa Purok Colis, Barangay Candulawan, Talisay City, niadtong alas 12:30 sa hapon, Miyerkules, Oktubre 2, 2024.
Ang suspek giila nga si Jeffrey Reponte Monterde, 37, biyudo nga taga Sityo Tabay, Barangay Tunghaan, Minglanilla.
Base sa nahipos nga inpormasyon sa Superbalita Cebu nga si Monterde giingong usa sa suspek niadtong nahitabong pagpamusil sa usa ka chief tanod sa Candulawan niadtong Agusto 10, 2024.
Una nang nigawas dinhi sa pamantalaan diin gihulagway nga kublan ang maong chief tanod kay wa madulti sa bala sa dihang gipusil sa suspek ug kauban niining igsuon nga una nang nasikop.
Ang Talisay City Police nipahigayon og joint hot pursuit operation uban sa Minglanilla police batok ni Monterde diin nahitabo ang ginukdanay ug misukol ngadto sa kapulisan.
Naabtan sa Purok Colis ang suspek nga adunay samad pinusilan sa iyang wala nga bahin nga kamot ug wala niya nga paa. Si Monterde nakuhaan og 45 kalibre ang armas, magazine nga nabinlan og usa ka bala, ug duha ka putos nga adunay sud nga gituohang shabu nga motimbang og pito ka gramo nga gibanabana nga mokantidad ngadto sa kapin sa P47,000. / DVG