Padayon sa pagsulbong ang Houston Rockets ug ilang gipanglampornas ang hosts Denver Nuggets, 128-108, aron irehistro ang ilang ikalimang sunodsunod nga kadaugan sa National Basketball Association (NBA) ning Huwebes, Enero 16, 2025 (PH time).
Padayon sab ang kabangis sa opensa ni Fil-Am Jalen Green ug gipangulohan niini ang Rockets pinaagi sa iyang 34 puntos lakip na niini ang unom ka three-point shots.
Si Green nag-average og 32 puntos sa niaging unom ka duwa sa Rockets lakip na niini ang iyang career-high nga 42 puntos nga iyang nahimo atol sa ilang daog batok sa Memphis Grizzlies, 119-115, sa niaging semana.
Nidugang og 20 puntos si Alperen Sengun samtang ning-amot og 16 puntos matag usa sila si Fred VanVleet ug Cam Whitmore alang sa Rockets nga ningpahugot sa ilang paggunit sa ikaduhang luna sa Western Conference dala ang 27-12 nga rekord.
Ang Nuggets nga nahagbong sa 24-16 nga rekord, ningkumbati nga wala ang duha sa ilang leading scorers nga sila si three-time MVP Nikola Jokic ug Aaron Gordon.
Adunay angol si Jokic sa iyang tuo nga siko samtang adunay angol si Gordon sa iyang tuo nga bagtak.
Lakip sa dakong hinungdan sa pagkapilde sa Nuggets gawas sa pagpalta nila ni Jokic ug Gordon mao ang ilang 18 ka turnovers nga napamahimuslan sa Rockets.
Ang Nuggets gipangulohan nila ni Jamal Murray ug Christian Braun pinaagi sa ilang 22 puntos kada usa samtang niamot og 17 puntos si Russell Westbrook.
Ningbulhot ang opensa sa Rockets pagsugod sa 2nd quarter ug ningburot ang ilang labaw ngadto sa 69-48 sa halftime.
Wala na nakabangon pagbalik ang Nuggets human niini. /AP