Patay ang usa ka mag-uuma human gipusil dihang nisulong ug nisulod sa balay sa suspek sa Sityo Domalerio, Barangay San Isidro, Lungsod sa San Francisco sa isla sa Camotes, alas 9:50 sa gabii, Sabado, Agusto 17, 2024.
Ang biktima giila nga si Richard Ramirez, 27, ulitawo. Ang suspek mao si Joven Formentera, 39, minyo, scrap buyer ug igsuon sa kapuyo sa biktima.
Sa pakisusi sa Superbalita Cebu, nasayran gikan sa imbestigasyon sa kapulisan sa San Francisco ubos sa kamadoan sa ilang hepe nga si P/Capt. Eduard Escultor nga nakadawat og tawag ang kapulisan gikan sa concerned citizen bahin sa nahitabong pagpamusil.
Daling nitubag ang kapulisan sa alarma ug pag-abot sa dapit, ilang nakita ang biktima nagbuy-od na sa salog sud sa balay sa suspek ug ang suspek wa na sa ilang balay.
Matod pa, ang biktima ug ang suspek dunay bangi mahitungod sa yuta sa uyoan sa suspek ug sa kapuyo sa biktima diin maoy motibo sa pagsuĀlong sa biktima.
Gisinggitan sa biktima ang suspek nga pagawson sa ilang balay aron magsumbagay sila, apan wa mogawas ang naulahi.
Dugang sa kapulisan, ang biktima nisud sa balay sa suspek ug ngadto sa kuwarta sa biktima hinungdan nga gipusil ug naigo sa iyang dughan nga hinungdan sa kamatayon niini.
Ang suspek ang daling nisibat sa maong dapit apan nadakpan sa hot pursuit sa kapulisan, alas 11:30 sa gabii, Sabado, Agusto 17, 2024, sa Sityo San Martin, Brgy. San Isidro.
Ang suspek gibalhog sa selda sa kapulisan ug gikatakda nga pasakaan og tukmang kaso ning adlawa. / DVG