'Misungag' sa van angkas nalabay

NALAGPOT: Patay ang angkas nga Grade 12 student human napantok sa sementado nga kal­sada sa Don Gregorio Antigua National Highway, Borbon sa dihang ang motorsiklo nga gimaneho ni Jay R Aribal, 22, nabangga sa gikasugat nga van, Mayo 20, 2024. Estorya sa pahina 2. / TAMPO
NALAGPOT: Patay ang angkas nga Grade 12 student human napantok sa sementado nga kal­sada sa Don Gregorio Antigua National Highway, Borbon sa dihang ang motorsiklo nga gimaneho ni Jay R Aribal, 22, nabangga sa gikasugat nga van, Mayo 20, 2024. Estorya sa pahina 2. / TAMPO

Dead-on-arrival (DOA) sa dihang gidala sa tambalanan ang 19 anyos nga dalaga, tinun-an sa Grade 12, human malagpot sa iyang giangkasan nga motorsiklo niadtong Lunes sa alas 4:40 sa hapon, sa Sityo Lamac, Don Gregorio Antigue National Highway, Lungsod sa Borbon, amihanang Sugbo.

Ang namatay giila nga si Crisden Dealagdon, samtang naangol ang drayber sa motorsiklo nga si Jay R Aribal, 22, ulitawo, tinun-an sa college, pulos taga-Purok Cacao, Don Gregorio Antigua, Borbon.

Ang gikaengkuwentro mao ang tourist van nga usa ka service vehicle sa beach resort nga gimaneho ni Rene Arreglado, 32, minyo, taga-Bitoon, Daanbantayan, Sugbo.

Sa imbestigasyon sa kapulisan sa Borbon ubos direktiba sa ilang hepe nga si P/Captain Jerry Antopina, ang mga biktima mopauli na unta sa ilang balay gikan sa eskwelahan.

Sa pagmaneho ni Aribal sa maong motorsiklo subay sa maong kalsada, kalit siya mi-left turn hinungdan nga mitadlas sa lane nga gisubayan sa maong van resulta sa ilang panagbangga.

Gumikan sa kakusog sa impact, ang mga sakay sa motorsiklo nangalabay.

Gumikan sa grabeng kadaut sa lawas nga naangkon ni Dealagdon, siya namatay bisan gisuwayan og tabang sa mga mananambal sa Verallo Bogo City Provincial Hospital ug gideklarar nga DOA, samtang si Aribal  gi-refer sa usa ka tambalanan sa dakbayan sa Sugbo.

Makita sa screengrab video human sa hitabo diin nalup-og sa dalan ang tinun-an nga angkas gisapnay sa iyang kabanay nga nagpunay og tiyabaw.

Si Arreglado naa na sa kustodiya sa kapulisan sa Borbon alang sa posibleng pagpasaka og mga kaso. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph