Misuway og sunog sa koral gikiha sa tunghaan

Arnold Bustamante
GIKIHA: Human mapasakai og kasong attempted arson, si Alejandro Bernardo Langi, 46, gibalhin sa custodial facility sa Cebu City Police Office gikan sa Carbon Police Station. / Arnold Bustamante

Gipasakaan og kasong attempted arson ang 46 anyos nga lalaki nga naatlan sa security guard sa University of San Jose- Recoletos (USJ-R) nga nisuway og sunog sa koral sa tunghaan sa habig sa dalan P. Lopez, Barangay Kalubihan, dakbayan sa Sugbo sa Huwebes Abril 4, 2024.

Si Alejandro Bernardo Langi, taga Dasuloan Lutopan, dakbayan sa Toledo, gibalhin sa temporary custodial facility sa Cebu City Police Office (CCPO) gikan sa Carbon Police Station diin siya gitugyan sa gwardya sa unibersidad.

Matod ni Langi nga dili niya tuyo ang pagsunog sa eskwelahan sanglit ang iyang tumong mao ang pag panagkot og kandila sa simbahan sa Carmelite.

Iyang gipasabot nga naandan na kaniadto pa nga diha siya managkot kon moabot siya og Carbon, apan wala na siya kahibawo nga gibalhin na diay ang dagkutanan.

Alang niya nga kon tuyo pa niya nga sunogon ang eskwelahan, dili na siya magdala pa og papeles nga naa didto ang tinuod niya nga ngalan.

“Naa sad koy sala gyud kay ang butangan diay sa ilang panagkutan didto ra gyud sa pikas. Pero mao man sad gud toy karaan sa una gud, kay nagdako ta sa probinsya, murag binukidnon na atong style sa pagsunod sa ilaha. Kay kon tuyo pa to nako, dili gyud ko magdala’g dokumento ug tinuod nga pangalan nga akong dalhon sa akong pagka tawo nga mag lakaw-lakaw ko sa kadalanan,” matod ni Langi.

Nangayo siya’g pasaylo sa kadagkoan sa Carmelite Sisters nga maoy nag dumala sa Carmelite Church sa USJ-R nga nabalaka sa iyang gihimo sanglit wala niya kini gituyo.

Iyang gipasabot nga dili na niya usbon ang iyang nahimo dungan sa pagpahibawo nga kaniadto nagtrabaho usab siya sa simbahan sa Talisay.

Apan sa usa ka video footage nga gihatag sa usa ka tinubdan sa Superbalita Cebu nagpakita sa iyang lahi nga lihok atol sa hitabo mga alas 6 pasado sa buntag sa Huwebes, Abril 4.

Makita nga ingon sa naniid siya nga way tawo nga makakita kaniya sa pagduslit sa koral. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph