Mopahigayon si senatorial candidate Francis Nepomuceno “Kiko” Pangilinan sa iyahang Miting de Avance sa Plaza Independencia sa dakbayan sa Sugbo karong Miyerkules, May 7, 2025.
Kini ang gikompirmar sa volunteer campaign group sa Sugbo sa kanhi senador nga gipangulohan ni Jojo Tiongko, ug mga kauban nga sila si John Michael Remollo, Sherwin Solomon Noval, ug Kaye Gabutan atol sa press conference niadtong Sabado, Mayo 3, 2025.
Ang maong kalihukan magsugod sa alas 4 sa hapon nga langkuban sa mga local artist ug national celebrities sama nila si Gary Valenciano, Piolo Pascual, Niki Valdez, Rivermaya, ug uban pa.
Matud ni Tiongko, nakahukom si Pangilinan nga anhi himuon sa Sugbo ang iyang Miting de Avance tungod kay matud pa gusto siyang mas maduol sa mga Cebuano, hilabi na nga atol sa iyang pagpangampanya sa nagkadaiyang lugar sa Probinsya sa Sugbo, nakita niya ang kahimtang sa mga residente hilabi na sa bukid.
“Our running senator really felt the importance of Cebu. And he wants to have his Miting de Avance for the whole Philippines done here in Cebu,” sigon ni Tiongko.
Gibutyag usab sa campaign team nga sa pagkakaron, walay laing kandidato sa pagkasenador, ingon lokal nga mga kandidato nga motunga sa maong kalihukan apan mamahimo gihapon sila nga mopakita og suporta sa kanhi senador.
Lakip usab sa motambong ang Cebu Youth Artists Society, mag-uuma, mananagat, vendors ug uban pang volunteers ug supporters.
Nakig-coordinate usab sila sa Philippine National Police alang sa seguridad sa lugar.
Sigon ni Noval nga ang kalihukan abli alang sa tanan.
“Everyone is welcome. Walang kulay,” matod ni Noval.
Misaysay ang campaign team nga wala sila bayari sa ilang gibuhat, sanglit nakita nila nga duna pay daghang mabuhat si Pangilinan isip usa ka senador.
Midugang usab ang grupo nga pila na ka tuig nila namugna ang organisasyon ug ilaha usab nga nakita mismo ang mga maayo nga nabuhat ni Pangilinan alang sa education sector, food security, mga mag-uuma ug mananagat.
“It’s really a plus if a Senator is a lawyer. We need people who have stood the test of time. Who merely has the heart of Service.” dugang ni Tiongko. / JDG