Miuwang sa away gipatay hinuon

CRIME SCENE: Mao kini ang dapit diin nahitabo ang pagpanunggab. / TAMPO
CRIME SCENE: Mao kini ang dapit diin nahitabo ang pagpanunggab. / TAMPO

Patay na nga nidangat sa Toledo City Hospital ang usa ka 26 anyos nga lalaki human dunggaba sa usa ka lalaki nga hubog nga nagmaoy sa national highway sa Brgy. Poblacion, Siyudad sa Toledo alas 4:10 sa Do­minggo sa kaadlawon, Mayo 19, 2024.

Ang biktima nga nakaangkon og samad dinunggaban sa tuong dughan giila nga si Jenard Bareta, 26, taga Sitio Santa Ana, Brgy. Poblacion, Dakbayan sa Toledo samtang ang suspek giila nga si Junrie Campania Anotado, 40, silingan sa biktima.

Sa imbestigasyon sa kapulisan nasayran nga samtang nag-inom ang biktima ug suspek uban sa mga higala, adunay gikaaway si Anotado nga gihulagway sa nakasaksi nga pwerte nang huboga.

Giuwang siya sa biktima apan kalit lang nga mikuha sa iyang kutsilyo ang suspek ug nidunggab sa tuong dughan sa biktima.

Naatol usab nga nagpatrolya ang mga polis sa Toledo ug ilang nakita ang komosyon.

Diha-diha dayon gidakop ang suspek ug nakuha usab ang kutsilyo nga maoy gigamit sa pagdunggab.

Dali nga gidala ang biktima sa tambalanan apan gideklarar kini nga dead-on-arrival sa doktor.

Matod ni Police Lieutenant Colonel Manolo Salvatierra, hepe sa Toledo City Police Station, nga ang biktima, kon dunay away, kanunay kini nga mouwang ilabi na kon kauban niya sa inom.

Karon lang kini nahitabo nga sa iyang pag-uwang siya na hinuon ang gidunggab ug namatay.

“Ito kasing victim base sa imbestigasyon natin ay talagang mahilig mag pacify pag may mga gulo. Siguro sa inuman ng mga nakaraang pagkakataon mahilig talaga siyang mag awat, at sa panahong ito nasaksak siya ug napurohan,” matod ni Salvatierra.

Nakuha sa mga polis ang kutsilyo nga maoy gigamit sa suspek sa pagdunggab sa biktima.

Gibalhog na sa custodial facility si Anotado ug mag atubang og kaso’ng homicide. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph