Patay dihadiha ang giila nga sakop sa fraternity human nga gitumba sa mamumuno sakay sa motorsiklo niadtong kadlawon sa Huwebes, Agusto 8, 2024.
Ang pagpamusil nahitabo sa Sityo Braman, Brgy. Mambaling, Dakbayan sa Sugbo. Ang biktima mao si Mario Sumilhig, 21, dunay kapuyo ug tindero og bottled water.
Sigon ni Police Major Efren dela Cruz Diaz Jr. sa Mambaling Olice Station nga sayong milakaw ang biktima sa ilang gipuy-an kay nangandam sa iyang ibaligya nga mineral water nga ibaligya sa South Road Property diin gipahigayon ang ika-51 nga anibersaryo sa fraternity, Agusto 8.
Apan kalit nga mibutho ang duha ka lalaki nagmotorsiklo ug ang angkas niini maoy mitira sa makadaghang higayon ngadto sa biktima.
Mitumaw nga ilegal nga drugas ang usa sa gitan-aw nga motibo sa pagpatay ni Sumilhig.
Samtang nanawagan og hustisya ang kapuyo sa namatay nga si Mary Jane Estenzo, 24.
Si Estenzo, nga nahinabi sa Superbalita Cebu nagkanayon nga wala sila masayod nganong gipatay iyang partner, nga wala kiniy kontra sa ilang lugar ug igo lang sila nanginabuhi sa pagpaninda og tubig.
Sumala pa niini nga nananghid iyang kapuyo nga mopalit og sigarilyo kay sayo kining mag preparar sa pagpamaligya og tubig kay motambong sa kalihukan sa fraternity.
Matod ni Estenzo nga wala nalambigit sa illegal nga kalihokan ang biktima. Aduna silay tulo ka mga anak nga nag-edad pa og sais anyos, tres ug tulo ka semana nga masuso. / DVG, GPL