Sakop sa usa ka fraternity patay nang niabot sa tambalaan human gipusil alas 11:00 sa gabii Lunes, Abril 29, 2024 sa may Sta. Lucia Property (V & G), Brgy. Poblacion Oriental, lungsod sa Consolacion, amihanang Sugbo.
Si Kyle Florida, hingkod, ulitawo, taga Brgy. Pulpogan, lungsod sa Consolacion, patay nang niabot sa Eversley Child Sanitarium Hospital sa Mandaue City human pusila makadaghan ug naigo sa nagkadaiyang bahin sa iyang lawas.
Way nakakita sa dapit kon si kinsa ang nipusil niini, ilabi na nga ngitngit ang palibot.
Mga buto-buto lang sa armas ang nabati sa mga residente.
Sa pagsusi nila, nagbuy-od nga naglunang sa dugo ang biktima.
Wala pa mailhi sa kapulisan killer, apan matod ni Police Lt. Col. Verniño Noserale, hepe sa Consolacion Municipal Police Station, nga duha ka mga anggulo ilang gisubay.
Unang ang away sa gang samtang ang ikaduha robbery o lungkab.
Gipasabot niya nga dili layo ang posiblidad nga dunay nasuko sa biktima kay sa miaging Disyembre, nakadungab sa usa ka sakop sa Bloods gang ang biktima.
Wala mokiha ang nadunggaban hinungdan nga usa kini sa ilang gisubay.
Ang biktima nasuta nga sakop sa usa ka fraternity apan giingong dili aktibo nga mag-apil-apil sa mga kalihokan.
Ikaduhang anggulo, sigun sa nakuha nila nga impormasyon, nalambigit kini sa lungkab.
Walay kabhang sa bala sa armas nga nakuha sa crime scene.
Nagtuo ang kapulisan nga revolver nga armas ang gigamit sa mga suspek. / GPL