Luha sa kaguol, inay luha sa kalipay, ang nasinati sa uyoan sa Grade 6 student nga momartsa unta sa iyang graduation ceremony, Mayo 29, 2024, sa Magon Elementary School sa Brgy. Magon, Tantangan, South Cotabato.
Gidala ni Reynan Billones ang hulagway ni Khurt Lowie Billones nga adunay mga medalya sa namatay nga estudyante.
Kahinumdoman nga nangayo og kuwarta ang biktima sa iyang amahan niadtong Mayo 25 dihang giingong nadasmagan sa pickup hinungdan nga nalagpot ug namatay sa tambalanan.
Naangol usab ang iyang amahan human naigo sa sakyanan ang iyang wala nga bitiis.
Nisurender sa Tantangan Municipal Police Station ang drayber sa pickup nga nakabangga aron limpiyohan ang iyang pangalan.
Giingong makadaghan nanghimakak ang drayber sa hitabo apan sa ulahi nitug-an na lang kini aron mapadali ang dagan sa kaso.
Matod sa Tantangan MPS nga iagi unta sa husay sa drayber ug sa pamilya sa biktima ang kaso apan mi-backout ang drayber tungod kay giingong mahal kaayo ang bayad nga gipangayo sa pamilya.
Niinsister ang drayber nga dili siya ang nakabangga sa mga biktima.
Gihagit na lang niini ang pamilya sa biktima nga pasakaan siya og kaso aron makapresentar usab siya sa iyang ebidensiya. / Superbalita Davao