Moalboal, Barili kampyon sa Inter-Town volleyball

Nahimong mga kampyon ang Moalboal ug Barili teams human nila gipangbuntog ang ilang tagsatagsa ka kontra sa finals sa managlahing mga kategoriya niadtong Mayo 5, 2024, sa First Mayor Inocentes Cabaron Invitational Inter-town volleyball tournament sa Moalboal covered court sa lungsod sa Moalboal, Cebu.

Gilangkat sa Barili ang men’s division title pinaagi sa paghampak sa host Moalboal, 20-25, 25-22, 25-22, 25-17.

Sa kadaugan, nabulsa sa Barili ang P50,000 nga ganti sa kampyon.

Nagkumboya sila si Aaron Beryl Ricaplaza ug Christian Karampatana sa pagmugna sa mahinungdanong mga puntos nga nagpadaog sa Barili.

Ang ubang mga sakop sa Barili mao sila si Alfonzo Obtina, James Timagos, Franz Piala, Svens Daclan, Rachaelus Nemeno, John Bargamento, Demterio Sta. Ana, Jester Clyde Bayang, Lance Manego, Ryan Paler, John Cydric Bayang ug John Paul Bulang.

Sa women’s division, nibawos ang Moalboal batok sa Barili, 25-12, 25-14, aron angkunon ang P50,000 sab nga ganti.

Sila si Marybelle Rose Cabaron, Jasmine Omagac, Junabelle Gempero, Juliana Isabel Gaba­les, Mary Christine Rebano, ug Shellce dela Rita mao ang ningbida sa Moalboal.

Ang ubang mga miyembro sa Moalboal mao sila si Rayvinder Tarongoy, Jay Ann Tapales, Ivony Love Templado, Lyka Sabanal, Jishin Faith Omagac, ug Precious May Domugho. / ESL