Moapil sa seaborne procession nga wala marehistro, dakpon

Dakpon, multahan ug silo­tan ang mga moduyog sa 460th Fiesta Señor seaborne procession kansang sakyanan sa dagat wala marehistro sa pag-apil sa kalihukan karong Sabado sa buntag, Enero 18, 2025.

Kini ang pasidaan ni Philippine Coast Guard (PCG) Central Cebu Commander Capt. Jerome Lozada sa usa ka press conference niadtong Miyerkules, Enero 15, 2025.

Gipasabot ni Lozada nga ang pag-apil nga walay rehistrasyon supak sa balaod ug mahimong hinungdan sa dili maayong mga insidente atol sa relihiyusong kalihukan.

“We are discouraging you pumunta, sumali, at sumakay ng inyong mga banca. Unang-una bawal ito. Baka mamaya madisgrasya kayo. Aside sa magkaproblema kayo, baka magkaroon pa kayo ng violation sa existing guidelines natin,” matod ni Lozada.

Gitataw ni Lozada nga "grabe" ang silot niadtong masakpan nga makalapas sa mga lagda sa seaborne parade.

Sumala sa PCGs Memorandum Circular No. 04-14, ang tag-iya, operator, o kapitan sa sakayan sa usa ka salakyanan nga tinuyo nga moapil sa marine parade, regatta, o uban pang kalihukan sa kadagatan nga dili awtorisado sa PCG mag-atubang og multa nga P5,000 ug usa ka pasidaan alang sa unang paglapas.

Sa ikaduhang paglapas, adunay multa nga P10,000 ug tulo ka buwan nga pagkasuspenso sa pag-operate sa mga sakyanan, samtang sa ikatulo nga paglapas, ang multa mosaka ngadto sa P30,000 ug ang pagkasuspenso molugway sa unom ka bulan.

Dugang ni Lozada, ang bar­ko gidid-an sa pagrehistro sa Maritime Industry Authority.

SEGURIDAD

Giangkon ni Lozada nga dakong hagit sa mga coast guard personnel ang pagdumala sa mga dili rehistrado nga partisipante sa sea parade.

Apan, si Lozada nipasalig nga sa kapin sa 460 ka PCG personnel nga gipakatap sa yuta ug tubig, ang mga pwersa hingpit nga na-optimize aron makontrol ug mapugngan ang bisan unsang pagkabalda sa hapsay nga pagpahigayon sa seaborne procession.

"They will not be allowed to join the fluvial procession, but for sure, they will be on the sidelines, waiting to greet the galleon. This is what we need to focus on — preventing them from approaching or greeting the galleon," dugang ni Lozada/DPC.