
Gipahibalo ni Gobernador Pamela Baricuatro nga magsugod na ang operasyon sa mobile clinic sa Probinsya sa Sugbo sa Camotes Island unya sa Hulyo 7, 2025.
Kini nga lakang kabahin sa mas lapad nga paningkamot sa gobernador sa pag-decentralize sa serbisyo sa panglawas ug pagpalapad sa access sa mga ospital gawas sa mainland sa Sugbo.
Atol sa usa ka press conference kaniadtong Huwebes, Hulyo 3, 2025, gidetalye ni Provincial Administrator Ace Durano ang mga serbisyo nga itanyag sa mga mobile clinic, nga naglakip sa diagnostics, X-rays, ug importanteng tambal para sa mga pasyente nga adunay chronic conditions sama sa taas nga presyon sa dugo ug diabetes. Duna say serbisyo sa dental.
Matod niya nga ang prayoridad nga unahon sa pagserbisyo mao ang mga labing nanginahanglan.
“Iprioritize ang kinsay angayng tagaan, we will see some movements already in the coming weeks,” matod ni Durano.
Pinaagi sa pag-deploy sa mga mobile clinic sa mga isla sa Sugbo, kini nga lakang nahiuyon sa nagpadayon nga paningkamot ni Gobernador Baricuatro sa pagpalig-on sa mga serbisyo sa panglawas sa mga ospital sa mainland.
“The first sight will be in Camotes, just to decentralize service…It is to strengthen what we have in the mainland,” gipasabot sa team ni Baricuatro.
Ang serbisyo sa panglawas kanunay nga prayoridad alang kang Baricuatro sukad sa iyang kampanya.
Sa iyang unang adlaw sa katungdanan, Hulyo 1, gipirmahan niya ang 12 ka executive orders, lakip na ang dinalian nga pagpagawas sa P5 milyunes nga budget alang sa emergency procurement sa matag usa sa 16 ka probinsyal nga ospital sa tibuok Sugbo.
Mokabat kini sa P80 milyunes, nga ipang-apud-apod sa 12 ka district hospitals ug upat ka provincial hospitals nga nahimutang sa mga Lungsod sa Balamban, Carcar City, Bogo City, ug Danao City.
Gipahayag sa team sa gobernador nga usa ka komprehensibo nga disenyo alang sa long-term logistics sa mga mobile clinic ang pagahimuon sa umaabot nga mga tuig, pagsiguro sa lapad nga pag-access sa healthcare sa tibuok probinsya.
Gawas sa mga mobile clinic, ang team sa gobernador gikatakda usab nga molusad sa mobile kitchen, nga gituyo sa pagpakaon sa mga kabus sa hilit nga mga lugar.
Apan wala pa'y mga detalye niini.
Sa iyang inaugural speech kaniadtong Martes, Hulyo 2, gipahayag ni Baricuatro nga ang iyang administrasyon nagsugod na og pakigsabotsabot sa mga health organization nga nisaad nga makig-partner sa probinsya alang sa kalidad nga serbisyo sa panglawas.
Ilaha usab nga tukion ang mga scholarship sa healthcare aron maka-produce og dedicated nga mga propesyonal alang sa mga ospital ug klinika sa probinsya.
Ang gobernador kaniadto misaad nga palig-onon ang healthcare system sa probinsya, nagplano sa pagpalit og sea ambulances alang sa mga isla sa Bantayan ug Camotes, nga limitado ang access sa medical emergency. / JPS