Malampusong gipahigayon sa Commission on Elections (Comelec) ang mock polls niadtong Biyernes, Enero 24, 2025, nga tipik sa ilang pagpangandam alang sa May 2025 national ug local elections, ug hasta Bangsamoro parliamentary elections.
Sa iyang hamubong mensahe, si Comelec Chairman George Garcia nipahibalo nga ang mock elections gipahigayon sa 30 ka mga barangay sa nagkalainlaing suok sa nasod.
"Mock elections completed," batbat ni Garcia. "This is part of our preparations and efforts to ensure that the election process will be orderly for our people."
Matod ni Garcia, 100 percent ang resulta sa transmission gikan sa polling precincts ngadto sa municipal/city canvassing centers, central server, poll watchdog servers, media servers, ug servers sa majority ug minority political parties, lakip na sa backup servers.
Nidugang si Garcia nga 100 percent sab ang transmission gikan sa Municipal Board of Canvassers paingon sa Provincial Board of Canvassers ngadto na sa National Board of Canvassers.
Ubos sa Republic Act No. 9369, ang pagpahigayon og mock elections nahilakip sa requirements sa Technical Evaluation Committee una kini moisyu og certification nga ang automated election system luwas, insakto ug mogana og tarong.
Sa Metro Manila, gipahigayon ang mock elections sa mga barangay sa San Pedro ug Sta. Ana sa Pateros; Ususan ug Pinagsama sa Taguig City; ug Poblacion ug Pio del Pilar sa Makati City.
Sa Luzon, gipahigayon kini sa mga barangay sa Poblacion ug Guinaang sa Bontoc, Poblacion ug Angkeling sa Sagada sa Mt. Province; lakip na sa mga barangay Dela Paz ug San Juan sa Antipolo City, ug Special District ug Bagumbong sa Jala-Jala, Rizal.
Sa Visayas, gipahigayon kini sa mga barangay sa Taboc ug San Gabriel sa Borongan, Poblacion 9 ug Masloc sa Lawaan, Eastern Samar.
Sa Mindanao, gipahigayon kini sa mga barangay sa Washington ug San Isidro sa Surigao, Poblacion ug Guinaang sa Placer, Surigao del Norte.
Sa Bangsamoro Autonomous Region sa Muslim Mindanao, gipahigayon kini sa mga barangay sa Walled City ug Bus-bus sa Jolo; Taglibi ug Anuling sa Patikul, Sulu; Batulawan ug Fort Pikit sa Malidegao, Pedtad ug Tamped sa Old Kaabakan sa Special Geographic Area. / HDT / SunStar Philippines