Moumol si outgoing Cebu City Mayor Raymond Alvin Garcia og task force aron mo-monitor, molusad og surveillance, ug mosusi matag Business Process Outsourcing (BPO) nga nag-operate sa Dakbayan sa Sugbo kon wala ba kini malambigit sa pagpangilad sama niadtong scam hub nga gipasirad-an human nag-viral sa social media nga nang-scam sa ilang kliyente sa gawas sa nasod.
Ang task force maglangkob sa Business Permit and Licensing Office (BPLO) Philippine National Police (PNP), National Bureau of Investigation (NBI), Department of Information and Communication Technology (DICT) ug ang buhatan sa City Administrator.
Niangkon si Garcia nga nakurat siya nga nitumaw ang maong modus sa pagpangilad nga nagtakuban nga lehitimo nga call center company.
Lakip sa iyang giangkon nga lisod ilhon ang usa ka BPO nga naghimo og ilegal sama sa pagpangilad nga maoy hinungdan nga mohimo og lakang ang kagamhanan aron pagsumpo niini.
“I will create a task force just to look into kaning mga operations sa especially sa kaning mga call center areas like IT Park and Ayala, we’ll create a task force to do monitoring, surveillance and to check one by one kung dili ba ni fraudulent nga mga operations ang ilang gibuhat,”matod ni Garcia.
Gipasalig sab sa mayor ngadto sa mga empleyado o mga call center agent sa BMJ Data Processing Services nga dili sila angay mahadlok nga mapasakahan og kaso tungod kay andam ang siyudad nga manalipod kanila.
Hangyo lang sa mayor nga kinahanglan mopatim-aw aron maklaro ang hitabo sanglit ang balaod naghatag man kanila og proteksyon.
Nipasabot ang mayor nganong kinahanglan sila nga mogawas ug mokooperar sa gihimong imbestigasyon sa kapulisan tungod kay nasayod sila kon unsay ilang gihimo. / AYB