Wa mahinayon sa iyang pagpa-uli sa ilang probinsya ang usa ka 27 anyos nga tindera kay gipasanginlan man siyang nangawat og mga tinda sa usa ka mini-mart sa Salinas Drive, Barangay Lahug, ning Dakbayan sa Sugbo niadtong Hulyo 25,2025.
Giila ang dinakpan nga si alyas Marie, lumad nga taga Escalante City, Negros Occidental apan kasamtangang nagpuyo dinhi sa Sugbo tungod sa iyang pagpanarbaho.
Sa imbestigasyon sa Mabolo Police Station, gireklamo si Marie sa iyang amo nga tag-iya sa maong tindahan ug gidala sa maong buhatan human giingong nabantayan kini nga nangdala og tinda.
Matod sa tag-iya, dihang nipahigayon kini og inspeksyon, namatikdan niya ang sako sa bag nga gipanag-iya ni Marie nga adunay mga grocery nga giingong wala nabayran.
Si Marie nitug-an nga ang mga tinda nga anaa niya humanag bayad ug ang uban iya rang gilista isip utang ug bayaran sa iyang pagbalik.
Nidugang kini nga wala siyay intensyon nga mangawat sanglit dugay na usab siya nagtrabaho sa maong tindahan nga mao ang iyang gisaligan sulod sa tulo ka tuig.
Taliwa sa pasangil sa iyang amo, hugot nga nangayo og pasaylo si Marie ug nihangyo nga di unta ipadayon ang pagpasaka og kaso sanglit kaslon siya sa Septiyembre.
Nakuha gikan sa dinakpan ang mga nagkalainlaing tinda nga gibanabana moabot ngadto sa P3,179 ang kinatibuk-ang kantidad.
Gitanggong na ang maong tindera sa substation sa Mabolo Police ug gipaabot nga mag-atubang kini og kasong Qualified Theft. / JDG