Nitestigo sa korte ning Martes, Disyembre 12, 2023 (PH time) si National Basketball Association (NBA) star Ja Morant nga self-defense ang iyang gihimo kabahin sa gipasaka’ng kaso sa usa ka teenager nga si Joshua Holloway.
Sa iyang kaso, si Holloway nipasangil kang Morant ug sa suod nga higala niining si Davonte Pack nga ningsukmag kaniya sa makadaghan atol sa usa ka pickup game sa panimalay sa ginikanan ni Morant sa Memphis niadtong Hulyo 26, 2022.
Nag-edad pa si Holloway og 17 niadtong higayuna.
Apan giklaro ni Morant nga kausa ra niya gisukmag si Holloway ug kausa ra sab kini gibuhat ni Pack ug ang kumo ni Pack maoy nakatumba ni Holloway.
Gipasabot ni Morant nga iya kining nahimo tungod kay gibanggaan ni Holloway ang iyang dughan ug niaksyon kini nga makigsinukmagay.