Giila nga top 1 Most Wanted Person sa provincial level ang nadakpan sa mga sakop sa Naga City Police Station pinasikad sa warrant of arrest sa Purok Tagaytay, Sityo Pangilatan, Barangay Inayagan, Siyudad sa Naga alas 11 sa buntag, Sabado, Agusto 26, 2026.
Ang akusado giila nga si alyas Lene, 47, construction worker nga taga Barangay Inayagan, Siyudad sa Naga.
Ang Drug Enforcement Unit uban sa Tracker Team sa Naga City Police Station nilusad og intelligence-driven operation aron i-serve ang 6 ka warrant of arrest batok sa akusado nga giluwatan ni Honorable Judge Albie Carmelo R. Pescadero, ang Presiding Judge sa Family Court sa Seventh Judicial Region sa Dakbayan sa Naga pinetsahan niadtong Agusto 25, 2026.
Ang 6 ka warrant of arrest naglangkob sa kasong Acts of Lasciviousness, Attempted Rape, 3 ka ihap sa kasong Statutory Acts of Lasciviousness, ug kalapasan sa Section 10(a) of Republic Act 7610, kun ang Special Protection of
Children Against Abuse, Exploitation and Discrimination Act.
Ang korte dunay gitugot nga piyansa nga balor P36,000 ngadto sa P120,000 depende sa kaso nga gipasaka batok kaniya.
Una nga gipasakaan og daghang kaso ang akusado human siya itumbok nga niamung-among sa usa ka 14-anyos nga babaye sa makadaghang higayon.
Sigon sa biktima nga kon mahubog ang maong construction worker, maoy ihimo sa krimen pinaagi sa paghikap sa pribadong bahin sa iyang lawas.
Dunay higayon nga samtang natulog ang biktima, gisuwayan sa pagpasulod ang kinatawo sa akusado apan tungod sa pagping-it sa kasakit sa 14 anyos, wala ni mahinayon.
Tungod sa pamahayag sa biktima, gisang-at ang kaso sa piskalya ngadto sa Family Court sa Siyudad sa Naga nga maoy hinungdan nga nalutsan ni og warrant of arrest. / AYB
