Nangamatay ang duha sa tulo ka mga tawo nga nag-inangkasay sa motorsiklo sa dihang nidasmag sa konkretong koral sa Martes sa kaadlawon, Enero 16, 2024 sa Marbeach Road, Barangay Marigondon, Lapu-Lapu City.
Ang mga nangamatay giila nga sila si Ralie Pangatungan, 29, taga-Sityo Datag, Maribago ug Judy Abella, 22, taga-Sityo Datag, Barangay Maribago, pulos mga ulitawo. Si Pangatungan mao ang drayber.
Samtang naangol ang angkas nga si Sarahfe Carvajal, 18, dalaga, taga-Santo Cristo, Kalubihan, Marigondon.
Sa imbestigasyon sa Lapu-Lapu City Police Office pinaagi ni traffic investigator PSSg Rodolfo Sudaria Jr., ang tulo nagsubay sa Marbeach Road sa dihang wa makotrolar ni Pangatungan nga maoy nagdrayb ug nilahos ang motorsiklo sa sementadong paril.
Tungod sa kakusog sa impact, nangalabay ang mga sakay.
Gidali sa city responders sa pagdala sa tambalanan ang mga biktima. Sila si Pangatungan ug Abella patay nang nangabot samtang padayon pang giatiman sa mga mananambal si Carvajal sa pagsuwat ning taho.