Namatay diha-diha ang 22 anyos nga lalaki human nabangga ang iyang gimaneho nga motorsiklo sa center island sa Dalan F. Llamas, Barangay Tisa, Dakbayan sa Sugbo, pasado alas 3 sa kaadlawon, Huwebes, Hulyo 25, 2024.
Ang biktima giila nga si Jesus Cañete II Jr., molupyo sa Sitio Lusimba, Barangay Basak San Nicolas, Dakbayan sa Sugbo.
Matod ni Carlo Taboñag, 21, higala sa biktima, nga gikan sila sa usa ka imnanan sa Barangay Gaudalupe uban sa iyang mga higala aron magplano alang sa usa ka birthday party sa lain nila nga higala.
Samtang nagsabotsabot, nag-inom sila ug pagka alas 3 sa kaadlawon nakahukom na nga manglakaw sakay sa ilang tagsa-tagsa ka motorsiklo.
Gihimakak ni Carlo nga daghan sila og nainom ug pulos sila hubog sanglit usa ka botelya lang nga hard liquor ilang gipalit.
Nag-una siya sa pagpadagan sa motorsiklo nga iyang gihulagway nga dili kaayo kusog apan pag-abot sa F. LLamas, giapas siya sa iyang kauban ug gipahibalo nga nabangga si Jesus.
Hugot sad niya nga gihimakak nga naglumbaanay sila sa pagpadagan sa ilang tagsa-tagsa ka motorsiklo.
“Dili pud kayo kusog among dagan kay ni menor man gani ko kay naa may eskina gud. Ni menor ko wala nako kabantay sa luyo kay nagsunod man na siya nako,” matod ni Taboñag.
Apan sa kuha sa CCTV video sa dapit, makita nga kusog ang dagan sa duha ka motorsiklo ug pag abot sa dapit, ang drayber nga naa sa ulahi nga motorsiklo wala na magsubay sa iyang lane ug didto nibangga sa center island nga maayong pagkalagpot sa drayber.
Tungod sa kakusog sa impact, nabunal ang ulo sa biktima sa sementado nga karsada ug nabuak ang gisul-ob niini nga helmet.
Nabuwag ang biktima sa iyang motorsiklo nga dunay gilay-on nga 19.35 metros sigun sa sukod sa taga Traffic Enforcement Unit sa Cebu City Police Office (CCPO).
Matod ni Police Staff Sergeant Lito Busalanan, imbestigador sa TEU sa CCPO, nga kusog gyud ang dagan sa biktima ug nakainom usab subay sa pamahayag sa iyang mga kauban.
“Medyo kusog-kusog gyud siya kay og hinay pani diha rana iyang motor natumba,” matod ni Busalanan.
Subling nanawagan ang kapulisan sa mga motorista nga kon makainom na labing maayo nga dili na mo-drive sa ilang mga motorsiklo aron sa paglikay sa disgrasya. / AYB