PATAY nang nadangat sa Mandaue City Hospital ang angkas sa usa ka motorsiklo human mabangil sa ligid sa trailer truck sa dalan D.M. Cortes Corner A.C. Cortes Street, Barangay Cambaro, Siyudad sa Mandaue alas 2:45 sa hapon, Martes Hulyo 15, 2025.
Ang biktima giila nga si Gechile Lucion Beltran, 26, residente sa Purok 2, Barangay San Jose, Siyudad sa Sugbo nga nakaangkon og grabeng kadaot sa ulo ug lawas.
Base sa imbestigasyon sa Traffic Enforcement Unit (TEU) sa Mandaue City Police Office, ang trailer truck nga gimaneho ni Teodie Pubay Ycot, 36-anyos, taga Tabok, Mandaue, nagdagan paingon sa norte samtang nagsubay sa inner lane sa maong karsada.
Inanay kini nga nibalin sa pikas linya aron mokuhag luna para moliko paingon sa tuo. Apan wala niya mabantayi ang usa ka motorsiklo nga naa sa wala nga bahin sa atubangan sa trak, hinungdan nga nadumbolan kini.
Ang maong motor gimaneho ni Roy Bontilao Borces, 34, taga Purok 2, Barangay Jose, Dakbayan sa Sugbo.
Tungod sa kakusog sa impact, nalagpot ang iyang kapuyo nga iyang angkas ug napasok sa ilawom sa truck ug nabagnos sa luyo nga ligid sa maong trak.
Nakaaginod pa og pipila ka metro ang trak una nakahunong diin naa sa ilawom ang biktima.
Si Borces maoy nipahibalo sa drayber nga naay tawo nga napasok sa ilawom sa sakyanan.
Gikustodiya sa TEU sa Mandaue City Police Office ang driver sa truck ug giandam ang kasong Reckless Imprudence Resulting in Homicide with Damage to property. / AYB