Motor napasok sa trak, drayber namatay

Motor napasok sa trak, drayber namatay
NAPASOK: Patay ang drayber sa motorsiklo, samtang angol ang angkas human nadasmagan sa trak de karga nga diha sa ilang luyo. Hulagway gikan ni Raffy Guc-ong

Patay nang nidangat sa tambalanan ang drayber sa motorsiklo samtang naangol ang iyang angkas sa dihang napaslak sila sa trailer truck niadtong Lunes, alas 3:40 sa hapon, Hunyo 24, 2024 sa national highway sa Brgy. Cansaga, Lungsod sa Consolacion, Sugbo.

Ang drayber sa motorsiklo giila nga si Sherwin Sumanting, hamtong, taga District 4, Brgy. Pulpogan, Consolacion samtang ang angkas giila lang sa ngala’ng Jev, 16, ulitawo.

Ang drayber sa trailer truck giilang si Mark Vincent Lucero, hamtong, taga Brgy. Corte, Lungsod sa Carmen, amihanang Sugbo.

Sa pasiunang imbestigasyon sa Consolacion police ubos sa pagdumala ni P/Lt. Col. Ruel L. Burlat, nasuta nga ang motorsiklo ug trailer truck susama og direksyon paingon sa norte.

Anaa sa atubangan ang motorsiklo nga giingong nadasmagan sa trailer truck ug napasok sa ilawom.

Ang mga biktima gidali sa pagtabang sa mga sakop sa Consolacion Municipal Disaster Risk Reduction Management ug gidala sa tambalanan apan ang drayber sa motorsiklo nakabsan sa kinabuhi.

Ang drayber sa trailer truck naa na karon sa kustodiya sa kapulisan, pasakaan og kasong reckless imprudence resulting to homicide, physical injury & damage to property kon di magkasinabot tali sa pamilya sa mga biktima. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph