Patay nang naabot sa tambalanan ang usa ka 47 anyos nga drayber og motorsiklo human naligsan sa dump truck duol sa mall sa South Road Property, Barangay Mambaling sa Dakbayan sa Sugbo sa alas 5:45 sa hapon, Huwebes, Mayo 22, 2025.
Ang biktima nga si Feliciano Yalaya Lascuña, 47, residente sa Sityo Laray, Barangay San Roque, Dakbayan sa Talisay, nakaangkon og grabe’ng kadaot sa lawas hinungdan sa iyang hinanaling kamatayon.
Ang driver nga nakabangga sa biktima nga gikustodiya karon sa Traffic Enforcement Unit (TEU) sa Cebu City Police Office mao si Margarito Avenido Abais, 38, taga White Road, Barangay Inayawan sa siyudad sa Sugbo.
Sa imbestigasyon sa TEU, pulos padung sa south ang truck ug ang motor diin ang drump truck nagsubay sa center lane, samtang ang motor anaa sa outer lane.
Apan pag-abot sa maong lugar, sigun ni Abais nga kalit lang nga miuntol ang iyang ligid sa tuong bahin sa sakyanan nga maoy hinungdan nga mihunong siya.
Daku na lang niyang kakurat nga duna nay tawo nga nag buy-od uban sa iyang motor sa karsada.
Dali nga nanawag og ambulansya ang mga sakop sa Cebu City Transportation Office aron madala sa Cebu City Medical Center apan gideklara kini sa attending physician nga si Dr. Orgil Arrabis nga dead on arrival.
Giandam na ang kasong reckless imprudence resulting in homicide batok sa driver sa truck, kinsa miingon nga wala niya kini tuyoa. / AYB