Nahabwa ang tinai sa driver sa motorsiklo human maligsan sa Isuzu dump truck ang lawas niini alas 10:25 sa gabii, Sabado, Mayo 17, 2025 sa national highway sa Barangay Tunghaan, Lungsod sa Minglanilla, duol sa Sisters of Mary School-Boystown.
Ang biktima nga namatay diha-diha dayon giila nga si Glemar Nuñez, 36, residente sa Tagaytay, Barangay Can-asujan, Dakbayan sa Carcar ug nagtrabaho isip usa ka warehouse assistant sa usa ka dakong kompanya sa dakbayan sa Mandaue.
Matod sa mga saksi nga nagsunod ang motor nga gimaneho sa biktima ug ang dump truck nga gimaneho ni Eric James Flores, 38, taga Camp 2, Dakbayan sa Talisay paingun sa habagatan.
Pag-abot sa maong lugar kalit lang nga nadumbol sa dump truck ang motor nga tungod ani nahulog ang biktima nga si Nuñez sa karsada ug napunta kini sa ilawom sa dump truck og naligsan.
Sa dugang pakisusi, matud sa mga nakasaksi, nga gituohang na slide ang maong motor hinungdan nga nalagpot kini padulong sa truck.
Gisuwayan pa sa pagdala ang biktima sa Minglanilla District Hospital apan gideklara kini nga dead on arrival ni Dr. Ayvan Lav Ylanan.
Matud ni Flores nga padulong na unta sila mangaon sa iyang asawa unahan og gamay sa dapit sa nahitaboan.
Apan matud niya nga nakugang na lang siya nga dunay nipaka sa atubangan sa truck hinungdan nga iya kining gikanaog og iyang nakita nga napasok na sa ilawom ang drayber sa motorsiklo.
Midugang si Flores nga dili kusog ang iyang dagan atol sa hitabo sanglit anaa siyay karga nga graba.
Giandam na ang kasong Reckless Imprudence Resulting in Homicide and Damage to Property batok ni Flores, nga kasamtangan’g gikustodiya sa Minglanilla Police Station. / AYB, JDG