Mohatag ang PMI Bohol Boxing Promotions og usa ka bag-ong motorsiklo isip grand prize sa ipahigayong raffle sa ilang gipasiugdahang “Kumong Bol-anon XII” boxing promotion nga gikatakda karong Nobiyembre 4, 2023 sa Bohol Wisdom Gymnasium sa Tagbilaran City, Bohol.
Nagkanayon si PMI Bohol Boxing Promotions head Floriezyl Echavez Podot nga ang tiket sa mga tumatan-aw mao na ang magsilbeng raffle ticket.
Ang mga tiket nagkantidad og P200 sa general admission A, P300 sa general admission B ug P1,000 sa VIP.
Ang general admisson adunay usa ka raffle ticket samtang ang VIP adunay upat ka raffle tickets ug libre na sab niini ang pagkaon, ilimnon ug kape.
Grocery items ang minor prizes sa raffle.
Sa main event sa promosyon, magsangka sila si hometown bet Regie “The Filipino Phenom” Suganob (13-1, 4KOs) ug Venezuelan Ronald Chacon (30-2, 22KOs) alang sa inilugay sa bakanteng World Boxing Organization (WBO) Global light flyweight title.
Sa co-main event, magsumbagay sila si Filipino Christian Balunan batok Adetip Maungcharoen sa Thailand alang sa inilugay sa bakanteng WBO Asia Pacific mini flyweight belt.