Nalabay ang 15 anyos nga drayber sa motorsiklo human nga nibangga sa gikasugat nga sakyanan samtang nagsubay sa dan sa Barangay Ginabla, Lungsod sa Badian, Lalawigan sa Sugbo.
Ang duguon nga aksidente nahitabo niadtong alas 6:00 sa gabii, Biyernes, Hunyo 27, 2025.
Gideklarar nga dead-on-arrival sa mga doktor sa Badian District Hospital mao si Janssen Luke Caballero Ermac, 15, taga Barangay Poblacion, Badian.
Samtang ang iyang kaluha nga si Eugene Luis nga nag-angkas ang gikatahong kritikal ang kahimtang ug naangol ang laing angkas nga batan-on nga ila ra sab nga klasmeyt.
Sa imbestigasyon sa Badian Police Station nga samtang nagmaneho sa motorsiklo si Janssen pauli na sa ilang balay sa Poblacion, sa pag-abot sa maong lugar ilang nakasugat ang Toyota Wigo, kolor yellow nga nagdala sa plate number GAK 3725 nga gimaneho ni Joey Gimenez Zamora, 28, taga Barangay Masa, Lungsod sa Badian.
NIGAWAS SA LANE
Sigon sa pamahayag sa mga nasaksi sa insidente nga kusog kaayo nga nakapadagan sa motorsiklo ang maong batan-on nga giingong nilapas sa pikas lane sa karsada.
Tungod sa kakusog sa pagpadagan wa dayon makalihay sa gikasugat nga awto nga miresulta sa head on collision ug ang mga sakay sa motor nangalagpot ngadto sa sementado nga kalsada.
Wa magsul-ob og helmet ang motorcycle riders niadtong higayona, sigon sa saysay sa mga nakakita. Ang drayber sa motor naumod ug na-deform ang usa sa paa samtang ang duha ka mga angkas pipila ka metros ang gilagputan.
Niresponde ang mga polis sa Badian uban sa mga personnel sa Municipal Disaster Risk Reduction and Management Office nga maoy nidala sa mga batan-on sa ospital.
Naangol sab ang duha ka sakay sa awto nga pulos taga Lungsod sa Dumanjug nga gidala usab sa tambalanan.
Gidala sa police station ang drayber sa awto ug giandaman og kasong Reckless Imprudence Resulting in Homicide and Damage to Property. / Dugang taho ni GPL