Namatay ang usa 22 anyos nga lalaki human ang iyang gimaneho nga motorsiklo nabangga sa punoan sa kahoy sa daplin sa barangay road sa Brgy. Obo, lungsod sa Dalagute sa alas 10 sa gabii sa Miyerkules, Enero 31, 2024.
Ang biktima giila nga si Dave Carl Marson Fernandez, taga Barangay Balisong, lungsod sa Argao.
Sa imbestigasyon sa kapulisan sa Dalaguete ubos sa kamandoan sa ilang hepe nga si Police Maj. Clemente Ceralde Jr. nasayran nga ang biktima gikan nagbilar sa usa ka haya sa Sityo Sua, Brgy. Mantalongon, bukirang dapit sa Dalaguete.
Sa iyang pagpauli, nagmaniho kini sa iyang motorsiklo ug giingong kalit nga nisimang paingon sa daplin ug nabangga sa punoan sa kahoy.
Tungod sa kakusog sa impact, ang biktiman nalabay gikan sa iyang motorsiklo.
Gidali siya sa pagtabang sa mga rescuer sa Dalaguete ug gidala sa tambalanan apan pipila ka mga gutlo, nakabsan sa iyang kinabuhi.