Patay ang usa ka 33 anyos nga lalaki human nadisgrasya sa gimanehong motorsiklo sa Sitio Buslot, Barangay Busay, Dakbayan sa Sugbo, alas 8:00 sa gabii, Dominggo, Disyembre 8, 2024.
Ang biktima giila nga si Antonio Rannan Pontillas Arigo, taga Dr. Sue Drive, Nasipit, Barangay Talamban, Siyudad sa Sugbo.
Sa imbestigasyon sa Traffick Enforcement Unit sa Cebu City Police Office (CCO) sa pagpangulo sa hepe niini nga si P/Lt. Col. Colonel Jomar Medil nga samtang nagdulhog ang biktima sakay sa iyang motorsiklo nga pag-abot sa likuon nga bahin, ni-overtake siya sa usa ka pribadong sakyanan agi sa tuo nga bahin apan nawagtangan sa iyang kontrol hinungdan nabangga sa punoan sa kahoy.
Sa kakusog sa dagan ug pagkabangga sa kahoy, nalagpot siya ug nakaangkon og dakong kadaot sa lawas nga niresulta sa iyang hinanali nga kamatayon.
Ang mga motorista na ang nanawag sa Cebu City Emergency Medical Services apan sa ilang pag-abot, wala na kini magginhawa ug wala na usab vital signs.
Awhag sa Traffic Enforcement Unit (TEU) sa mga motorista nga magmaneho nga ibutang kanunay sa ilang hunahuna ang kaluwasan.
Ang pag-overtake sa tuo, maayo lang nga buhaton kon lapad ang karsada apan kon duha lang ka lanes labing maayo nga mosunod sa balaod trapiko ug sundon usab ang mga traffic sign sa karsada aron malikayan ang disgrasya.
Base sa datos nga gipahibawo sa Barangay Busay nga moabot na sa tulo ka kinabuhi ang nakalas sa disgrasya sa motor nga nasakop sa ilang barangay.
Niadtong milabay nga buwan, nagbutang og vehicular tool board ang Barangay Busay pinaagi sa abag sa P5 iDRIVE Driving school ug Highway Patrol Group (HPG) 7 aron ipahimangno sa mga motorista nga mag-amping sa pagmaneho sa ilang mga motorsiklo kon moagi sa transcentral highway tungod kay peligro sa disgrasya gumikan sa kadaghang blind curve.
Sa tulo nga nakalas ning ulahi, apan niabot na sa 152 ka mga tawo ang nangaangol ug kasagaran kanila dili taga Barangay Busay.