Gikataho’ ng hubog ang drayber sa motorsiklo nga giingong milahos ug nabangga ngadto sa naka-park nga heavy equipment sa kalsada sa Barangay Saavedra, Lungsod sa Moalboal, Sugbo niadtong Lunes, Abril 29, 2024 sa gabii.
Ang biktima giila nga si Donald M. Faciol, 33, ulitawo, taga Brgy. Saavedra, Moalboal, kinsa nalandig sa tambalanan, samtang ang heavy equipment nga backhoe gi-operate ni Rufino Bontog Garcia, 32, taga-Calape, lalawigan sa Bohol.
Base sa gihimong imbestigasyon ni Police Chief Master Sgt. Stewart Bayang, giingong nakainom og ilimnong makahubog ang biktima nga nagmaniho sa motorsiklo.
Samtang sigun sa nakasaksi nga kusog nakapadagan sa iyang motorsiklo si Faciol.
Matod pa nga sa pagliko sa kurbadahon nga bahin sa kalsada daw nipilit ang motor ngadto sa backhoe nga nag-parking daplin sa dalan.
Gumikan sa impact, naangol ang biktima ug gidali sa pagdala sa Badian District Hospital.
Nagkasabot na sab ang duha ka habig sa tuyo nga di na mosangpot sa kinihaay. / GPL