Gidepensahan sa Artsidyosesis sa Sugbo ang pagkatudlo ni Msgr. Roberto “Boy” Alesna isip chaplain sa San Pedro Calungsod Chapel ug priest-in-charge sa Divine Mercy Center Project sa Consolacion.
Kini subay sa pagkwestiyon ni retiradong Court of Appeals Justice Gabriel Ingles sa reassignment ni Msgr. Alesna nga nagpanuigon na og 75-anyos.
Giklaro sa Artsidyosesis nga ang katungdanan ni Msgr. Alesna dili pastoral, kondili “project-based” nga nagtutok sa fundraising ug pagpalambo sa imprastraktura.
Base sa sulat nga gipirmahan ni Msgr. Renato Beltran Jr., ang appointment ni Msgr. Alesna tubag sa dinalian nga panginahanglan. Dili kini supak sa mga lagda sa simbahan o sa tradisyon sa Artsidyosesis.
Apan si Justice Ingles nangutana ngano nga espesyal nga pabor ang gihatag kang Msgr. Alesna.
Matod niya ubang mga pari nga nag-edad og 75, wa na panghatagi og bag-ong posisyon.
Siya nangatarungan nga ang naandan nga pagretiro sa mga pari sa edad 75 kanunay nga gisunod sa Artsidyosesis ug ang paghimo og exception makadaot sa disiplina ug pagkamakiangayon.
Ang Artsidyosesis nangatarungan nga si Msgr. Alesna mismo ang nagpakita og kaandam sa pagpadayon sa iyang serbisyo bisan pa sa iyang edad. / CAV