Patay ang 61-anyos nga lola ug tulo ang naangol human nabanggaan sa naghaguros nga motorsiklo ang multicab nga ilang gisakyan niadtong alas 10:40 sa gabii sa Miyerkules, Agusto 6, 2025, sa Barangay Bato, Dakbayan sa Toledo.
Ang namatay giila nga si Maria Allarse Macapobre, 61, usa ka vendor.
Matod sa imbestigador sa Toledo Police Station, ang motorsiklo niigo sa dapit sa front seat sa multicab diin naglingkod ang biktima nga namatay.
Gideklarar si Macapobre nga dead onarrival (DOA) sa ospital.
Ang mga naangol mao sila si Wilfredo Lorcon Maturan, 44, ang driver sa multicab, Margileto Allarse Macapobre, 37, pasahero sa multicab, Ryan Canillo Naranjo, 31, ang drayber sa
Yamaha Aerox nga motorsiklo nga nadasma ug kritikal ang kahimtang ni Naranjo.
Base sa imbestigasyon ni Police Staff Sgt. Jonathan Cuizon, gikan nag-deliver og baboy sa Barangay Dumlog ang mga biktima ug pauli na unta sa ilang balay.
Dihang niliko ang multicab padulong sa ilang barangay, kalit kining gibanggaan sa motorsiklo ni Naranjo.
Luwas ang duha ka bata nga sakay sa multicab nga sila si Christy Mae Basiles Flores, 9, ug John Earl Basiles Flores, 8.
Giklaro sa kapulisan nga anaa sa saktong posisyon ang multicab sa dihang nahitabo ang aksidente. / GPL