Nasunog ang usa ka pick-up nga multicab samtang nagdagan kini sa Ouano Avenue, Reclamation Area, Barangay Subangdaku, dakbayan sa Mandaue, alas 9:30 sa buntag, Dominggo, Mayo 19, 2024.
Ang tag-iya sa maong multicab nga mao ra usab ang nagmaneho nga si Efrelio Batilis, 38, taga Purok Sitaw 3, Barangay Catarman, lungsod sa Liloan niasoy nga kalit lang nga misilaob ang iyang sakyanan.
Dali nga nakapangayo’g panabang sa bombero ang mga tawo sa dapit apan wala na kini masalbar pa tungod sa kadali sa pagkatap sa kayo sa mga parte niini.
Hingpit nga napawong ang kayo alas 9:40 sa buntag.
Faulty wiring ang usa sa gituohan nga hinungdan sa maong sunog nga nidanyos og P100,000. Atol ning pagsuwat, wala pa matino ang hinungdan sa pagsilaub sa multicab. / AYB