Kuwestiyunable ang estado ni Jamal Murray sa pag-host og balik sa defending champion Denver Nuggets sa Los Angeles Lakers ning Martes, Abril 30, 2024 (PH time) sa Game 5 sa Western Conference 1st round playoffs series sa National Basketball Association (NBA).
Nakasinati si Murray og angol (calf) sa 4th quarter atol sa kapildihan sa Nuggets sa Game 4, 119-108, sulod sa balwarte sa Lakers niadtong Dominggo, Abril 28, 2024.
Si Murray, kinsa usa sa labing mga sinaligan sa Nuggets, nakapalta og 23 ka mga duwa ning maong season tungod sa nagkadaiyang natad sa pagkaangol.
Ang kondisyon ni Murray daw usa ka maanindot nga musika alang sa Lakers, nga mamasin nga makaposte og kasaysayan isip sa labing unang puwersa nga makabangon sa hingpit gikan sa 0-3 nga biya sa best-of-series.
Kasamtangang naggukod ang Lakers sa series, 1-3.
Sa laing mga duwa ning adlawa, magsangka ang Oklahoma City Thunder batok New Orleans Pelicans ug Boston Celtics batok Miami Heat. Ang Thunder naglabaw og dako batok sa Pelicans, 3-0, sa ilang West samtang nakabintaha ang Celtics sa Heat, 2-1, sa East. / AP