‘Muscle Man’ operahanan sa tuhod

Gibana-banang dili makaduwa si San Miguel Beermen forward Vic Manuel labing ubos sulod sa duha ka mga buwan sa Philippine Basketball Association (PBA) Season 48 Commissioner’s Cup gumikan kay operahanan ang angol sa tuhod niini.

Nagkanayon si San Miguel team manager Gee Abanilla, ang operasyon nakabasi sa rekomendasyon sa inilang orthopedic surgeon nga si Dr. George Canlas.

Nidugang si Abanilla nga kinahanglang maoperahan ang gitawag og “Muscle Man” sa labing dali nga panahon.

Gipasabot ni Abanilla nga kon matuman ang ilang mga plano, posibleng dili ra moabot og duha ka mga buwan ug makabalik na pagduwa ang 38 anyos nga magduduwa.