Malampuson nga gilunsad sa Wise Immigration and Study Services kauban ang Four Seasons Immigration ang Media Launch Vlog Competition nga gipahigayon sa Wise Immigration Conference Room, F. Ramos St., Cebu City, niadtong Marso 22, 2025, uban sa temang: “My Canadian Dream.”
Kini nga kompetisyon usa ka mahinungdanong plataporma nga naglangkob sa mga estudyante ug naghatag kanila og daghang oportunidad sa Canada ang dapit diin ang mga damgo mahimong tinuod.
Ang mga estudyante sa University of the Visayas (UV) BA-Communication Major in Convergent Media malipayong mipahimulos sa maong kahigayunan aron ipakita ang ilang pagkamatinud-anon, kinaadman sa paggama, ug abilidad sa storytelling pinaagi sa paghimo og insightful vlog mahitungod sa labing dako nilang pangandoy nga makaskwela sa gawas, samtang gipakita usab ang dagkong oportunidad nga gitanyag sa Canada alang sa mga nagtinguha nga mahimong international students.
Gianunsiyo ni Junessa Palconit, Documentation Manager sa Four Seasons Immigration, atol sa Media Launch Conference ang ilang panag-uban sa mga bantugang kolehiyo ug unibersidad sa Canada.
Matod niya nga ang Canada nag-abli og pipila sa labing maayong eskwelahan sa kalibutan nga naghatag dili lamang dekalidad nga edukasyon kondili usa ka tin-aw nga agianan padulong sa mas hayag nga kaugmaon.
Sigon sa Wise Immigration nga ang pagtuon ug pag-migrate sa Canada abli dili lang alang sa estudyante kondili para sa tanang interesado.
Ang international students makadala sab sa ilang pamilya ug makapangita og tarong nga trabaho nga mahimong posible pinaagi sa legal nga proseso uban sa giya sa Wise ug Four Seasons Immigration.
Bisan pa sa hagit sa pagsugod sa pagpangandam alang sa pag-eskwela sa Canada, andam ang Wise Immigration nga mohatag og suporta.
Gikan sa aplikasyon sa visa hangtod sa pag-settle sa Canada, sigurado nga hapsay ug walay kabalak-an ang matag lakang sa mga estudyante.
“Gisiguro sa mga eskwelahan nga ang tanang programa nga ilang gitanyag alang sa international students magdala sa kalampusan sa ilang karera ug dugay nga pagpuyo sa Canada,” matod ni Palconit.
Gibutyag sa Wise Immigration nga ang Canada usa ka maayong destinasyon alang sa mga Communication student nga nagtinguha nga mahimong inspiradong broadcast journalists. Kini tungod sa lig-on nga industriya sa komunikasyon, dekalidad nga journalism programs, ug daghang oportunidad alang sa malampusong career sa media.
“Daghang oportunidad ang naghulat para kaninyo dinhi, labi na sa journalism sa Canada. Gisiguro sa mga eskwelahan nga bisan unsa ang kurso nga inyong pilion, kini in-demand sa merkado,” dugang ni Palconit.
Apan kini pa lang ang sinugdanan kay ang kompetisyon usa lamang ka pagpangandam alang sa umaabot nga Canada Education Fair nga ipahigayon sa SM Seaside City Cebu karong umaabot Abril 5, 2025. / Sinuwat ni New Jane Bual, UV BA-Communication student