Gisaulog ug gidawat sa Milwaukee Bucks ang ilang gitawag nga importante nga player nga nakuha sa free agency--si Myles Turner.
Si Turner nabira sa Bucks gikan sa Indiana Pacers, ang iyang team sulod sa 10 ka tuig National Basketball Association (NBA).
Apil si Turner sa pwersa nga nidala sa Pacers ngadto sa NBA Finals, apan nakuwangan lang ang ilang pwersa sa Game 7 sa NBA Finals kontra Oklahoma City Thunder.
“I hate when they say the grass can't be greener on the other side," matod ni Turner. "I’m confident enough to say the grass is going to be greener wherever I go."
“My girlfriend told me I look good in green,” dugang pa niya nga nalingaw sa bag-ong porma.
Makahatag si Turner og kabatan-on ug versatility sa Milwaukee. Si Brook Lopez, nga 37 anyos na, maoy center sa Bucks niadtong milabay nga season. Apan ang 29-anyos nga si Turner, posible pa nga mo-peak pa sa iyang career.
Si Bucks head coach Doc Rivers kompiyansa na nga molihok kini nga kombinasyon, ilabi na nga nakuha nila si Turner pinaagi sa waive-and-stretch provision batok sa nahabiling duha ka tuig ug $111 milyon nga kontrata ni Damian Lillard. / RSC