N. Bacalso Ave. sirhan sud sa 1 ka buwan

Cebu City map.
Cebu City map.

Mga motorista ug mga pasahero hayan mag-antos sa posibleng kahuot sa trapiko tungod kay dunay bahin sa Natalio Bacalso Ave., Cebu City kasamtangan nga sirhan sud sa 30 ka adlaw, o hangtod na sa Hunyo 19, 2024.

Giaprubahan sa Cebu City Traffic Management Coordination Committee (TMCC) ang resolusyon nga nag-aprobar sa temporaryong pagsira sa mga dalan sa southbound lanes gikan sa eskina Osmeña Blvd. ug P. del Rosario St. intersection paingon sa atubangan sa Cebu City Central School gikan sa Mayo 20 hangtod Hunyo 19.

Ang temporaryo nga pagsira sa karsada maoy paghatag og dalan sa mga pavement works sa Cebu Bus Rapid Transit (CBRT) intersection.

Ang traffic advisory nga gitaod sa Osmeña Blvd. ug N. Bacalso Ave., mga motorista nga mopaingon sa habagatang bahin sa dakbayan sa Sugbo agi sa Osmeña Blvd. gitambagan nga mosubay sa Sanciangko St. lahos sa Panganiban St. ug dayon sa Tres de Abril St. paingon sa N. Bacalso Ave.

Sa mga motorista nga moagi sa P. del Rosario St., gitambagan nga moagi sa Sikatuna St. ug mopadayon sa J. Zamora St. ngadto na sa Sanciangko St.

Samtang, gitambagan ang mga pedestrian nga mogamit sa pedestrian lane nga nahimutang sa Leon Kilat St.

Samtang giaprubahan sa TMCC ang 30 ka adlaw nga pagpasira sa karsada, ang kontraktor ni-post lang sa traffic advisory nga molungtad lang og 15 ka adlaw ang pagpasira.

Si TMCC Secretary ug Cebu City Transportation Office (CCTO) Legal Officer Kent Jongoy, sa interbyo niadtong Martes, Mayo 21, niingon nga gidawat sa kontraktor ang hagit sa Siyudad sa pagpamubo sa pagsira, apan kon dili pa igo, mahimong mahurot nila ang 30 ka adlaw nga gihatag kanila.

Ang mga trabaho alang sa unang package sa CBRT nga proyekto nagpadayon pa.

Ang Package 1 naglangkob sa trunk line gikan sa Cebu South Bus Terminal (CSBT) paingon sa Cebu Provincial Capitol sa uptown Cebu City agi sa Osmeña Blvd., nga adunay rota nga 2.38 kilometros.

Ang Package 2 gilangkuban sa mga rota gikan sa Kapitolyo paingon sa Cebu IT Park sa Brgy. Lahug ug laing rota gikan sa CSBT paingon sa SRP.

Ang Package 3 maglakip sa mga rota gikan sa Cebu IT Park paingon sa Brgy. Talamban ug gikan sa SRP paingon sa Talisay City. Lakip usab niini ang feeder line system nga modagan sa nagkasagol nga trapiko, nga adunay duha ka feeder terminal sa 76 ka bus stops sa Cebu City ug Ta­lisay City.

Ang CBRT nga proyekto gipaabot nga magsilbi sa 60,000 ka mga pasahero kada adlaw sa unang tuig sa operasyon niini, ug hangtod sa 160,000 ka mga pasahero sa higayon nga hingpit nang magamit. / JJL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph