Lima lang sa libuan ka mga sakyanan nga na-impound sa Mandaue City ang gitakda nga i-release kay gilukat sa mga tag-iya human subli nga gipatuman ang amnesty program.
Matod sa pangulo sa Traffic Enforcement Agency of Mandaue (Team), Hyll Retuya sa interview niadtong Miyerkules, Mayo 7, 2025, ang lima ka mga sakyanan nga gilukat gikan sa impounding area mga motorsiklo.
Ang amnesty program gipatuman pagbalik niadtong Mayo 2 ug molungtad kini sa Hulyo 31.
Kini nagtanyag sa mga tag-iya og sakyanan sa paglukat sa ilang mga unit nga na-impound niadtong 2023 o mas sayo pa sa pagbayad lang og P1,000 isip storage.
Apan kining maong kantidad wala maapil ang towing ug violation fees nga kinahanglan i-setle.
Matod ni Retuya nga daghang tag-iya sa mga na-impound nga mga sakyanan ang nagpakisayod ug maoy ilang pagtuo nga ang P1,000 mao ra gyud ang ilang bayranan.
Iyang gipasabot nga kini alang lang sa storage fee ug kinahanglan pang bayran ang ubang penalties ug violation.
Kadaghanan sa mga lukatunon nga mga motorsiklo ni-expired na ang registration ug ang uban wala gyud marehistro.
Sagad sa mga na-impound nga mga sakyanan dunay bayranan nga P2,500 ngadto sa P3,000.
Ang Dakbayan sa Mandaue ni-target sa pag-release sa 1,000 ka impounded vehicles atol sa amnesty period.
Ang impounding facility nahimutang sa karaang Mandaue public market.
Ang mga tag-iya gitagaan og tulo ka buwan nga lugway sa paglukat sa ilang mga motorsiklo.
Ang na-impound nga mga sakyanan nasakmit tungod sa nagkalainlaing kalapasan sa traffic sama sa way lisensiya ang driver, way rehistro, unauthorized modifications, illegal parking, reckless driving, ug driving under the influence of alcohol o drugs.
Uban sa mga na-impound niabot na og napulo ka tuig .
Usa sa mga rason nga wa na panglukata ang mga motorsiklo tungod sa kadako na sa ilang bayranan sa storage fee.
Ubos sa kagamtangang sistema, ang mga motorsiklo dunay tag P100 matag adlaw nga storage fee.
Mga dagkong sakyanan sama sa awto o truck tag P500 ang storage fee matag adlaw. / CAV