Duha ka mga lalaki nga way trabaho ang nasikop sa kapulisan dihang magtinabangay unta pagsuyop sa usa ka pakete nga gituohang shabu alas 10:00 pasado sa gabii, Hunyo 16, 2025, sa Balagtas, Barangay Pahina Central, Siyudad sa Sugbo.
Ang mga nadakpan mao sila si alyas Peter, 57-anyos, ug si alyas King, 25, nga parehong mga residente sa nahisgutang barangay.
Subay sa imbestigasyon sa Carbon Police Station, nasikop ang duha ka suspek atol sa gipahigayon nga Anti Criminality Campaign sa Tracker Team sa nahisgutang lugar ug nakuha kanila ang gituohang ilegal nga drugas.
Nakuha gikan kanila ang usa ka gamay nga pakete sa gituohang shabu nga adunay 0.06 gramos nga gibug-aton ug mobalor og P408. Ang mga ebidensya gisumiter na sa PNP Cebu City Forensic Unit alang sa dugang eksaminasyon. Nangabalhog ang duha sa Carbon Police Station ug mag-atubang sila og kasong dunay kalambigitan sa ilegal nga drugas. (JDG)