Gibalhog sa prisohan ang usa ka 29-anyos nga lalaki human naaktuhan sa kapulisan nga namaligya og gituohang shabu mga alas 10:00 sa gabii, Hulyo 21, 2025, sa Barangay Basak San Nicolas, Dakbayan sa Sugbo.
Nailhan ang dinakpan sa alyas nga Ar-ar, walay trabaho ug residente ra sab sa nahisgutang barangay.
Base sa imbestigasyon sa Mambaling Police Station, nadakpan ang suspek atol sa gipahigayon nga Oplan Bulabog sa maong buhatan pinangulohan sa hepe nga si Police Captain Wilmer Castillo.
Naaktuhan sa kapulisan ang suspek nga namaligya og gituohang ilegal nga drugas ngadto sa usa ka wala pa mailhing lalaki. Dihang namatikdan sa suspek ug sa nipalit ang presensya sa kapulisan, naglumbaanay sila og dagan sa managlahing direksyon.
Apan malampusong nadakpan sa mga polis ang suspek ug nakuha gikan sa iyang posisyon ang 5 ka gagmay'ng pakete sa gituohang shabu nga mobalor og P2,720. / JDG