Gibanabanang moabot sa 5,000 runners ang magginukdanay sa ikatulong edisyon sa Lite Ferries Anniversary Run nga gikatakda karong Hulyo 27, 2025, sa Pescadores Road sa Cebu Business Park.
Sa usa ka press conference ning Miyerkules sa buntag, Hunyo 25, gipabuhagay sa mga nag-organisar nga mas makalingaw ug mas grandiyuso kining maong edisyon sa lumba, nga tipik sa kasaulogan sa ika-34 ka mga tuig nga anibersaryo sa kompanya.
Si Geraldine Cosmod, AVP for Finance, nagkanayon nga ang mokuha og dakong atensyon ning higayuna mao ang lokal nga mga banda nga magpulipuli sa pagpanukar gikan sa sinugdanan hangtod mahuman ang lumba.
Niini, gidugang sa mga nag-organisar ang linya nga “Run & Jam” sa opisyal nga pangalan sa lumba ning maong edisyon.
“It’s a sort of street party. Puwede mo-jam ang participants sa band,” matod ni Cosmod.
Si Bryan Ernest Quisumbing, Lite Shipping Corporation’s Passage and Area Manager, nipasabot nga mas nadasig sila sa pagpasiugda sa lumba ning higayuna tungod sa dakong kalampusan nga naangkon sa nag-unang duha ka mga edisyon.
Gawas nila ni Quisumbing ug Cosmod, naa sab sa presscon sila si Ruby Ann Bernasor, Head of Audit; Irving Jay Ang, Ads and Promotions Manager; Roger Bernasor, Senior Accountant; ug Joel Juarez, race director gikan sa Coco Running.
Ang mga kategoriya nga kombatihan mao ang half-marathon 24K, 16K, 10K, 5K, ug 3K.
Adunay duha ka bag-ong Honda Giorno motorcycles nga ipa-raffle atol sa awarding ceremony.
Mahimong makaparehistro sa official website sa Coco Running ug Lite Ferries Anniversary Run Facebook page. / ESL