Ang New York Knicks ug ang Indiana Pacers naghupot og lawom nga kasaysayan sa rivalry ug mao kini ang mabuhi sa pagsugod unya sa Eastern Conference Finals karong Huwebes, Mayo 22 (PH time).
Ang unang duha ka duwa didto sa Madison Square Garden sa dili pa motabak didto sa Gainbridge Fieldhouse sa Indianapolis para sa Game 3.
Kahinumdoman nga misulbong ang Pacers-Knicks rivalry dekada 90, diin kaunom gatagbo ang duh aka teams sa postseason sa 1993 ngadto 2000.
Ang usa sa greatest shooter nga si Reggie Miller usa sa mga karakter niadtong panagsangka diin nahimo kining bida sa Pacers ug dako nga kontrabida sa Knicks sulod sa walo ka seasons.
Lakip sa mga highlights sa Knicks-Pacers rivalry mao kadtong 25 puntos ni Miller sa fourth quarter ug ang iyang gibuhat nga “choke sign” nga gipunto ngadto kang Spike Lee tuig 1994.
Napun-an pa kini ang highlight ni Miller og walo ka puntos sulod sa siyam ka segundos sa sunod tuig nga hangtod karon usa gihapon ka parti sa kasaysayan sa Madison Square Garden.
Sa habig sa Knicks, ang legendary nga "four-point play" ni Larry Johnson sa kataposang bahin sa Game 3 sa 1999 Eastern Conference Finals mao ang highlight nga mitabang sa Knicks pagsulod sa NBA Finals.
Ang Knicks mao ang una nga No. 8 seed sa kasaysayan sa liga nga nakasulod sa Finals, bisan pa napilde sila sa Spurs sulod sa lima ka duwa.
Niadtong tuig 2000, nagtigi ang Pacers ug Knicks sa Eastern Conference Finals gihapon. Midaog ang Pacers niadtong tungora, 4-2.
Biyente singko ka tuig ang milabay mag-abot pagbalik ang duh aka teams.
Kini nga matchup mao na sab ang ikaduhang sunod nga tuig nga mag-atubang ang duha sa labing maayo nga point guards sa liga nga si Tyrese Haliburton ug ang kapitan sa Knicks nga si Jalen Brunson.
Ang Pacers ug Knicks pulos mibihag og mas taas nga ranking sa ilaha sa second round playoffs.
Ang No. 4 nga Pacers mibuntog sa top-seeded nga Cleveland Cavaliers, samtang ang No. 3 Knicks mihukas sa korona sa kanhi kampiyon Boston Celtics. / RSC