Patay ang drayber sa oil tanker nga nidasmag sa iyang gisundan nga kaubang oil tanker nga maoy hinungdan sa pagsarasay ug nibangga sa koral sa usa ka subdivision sa Cebu South Coastal Road (CSCR) sa Brgy. Cansojong, dakbayan sa Talisay, alas 4 sa kaadlawon sa Miyerkules, Nobiyembre 8, 2023.
Ang namatay giila sa awtoridad nga si Jose Alvior, minyo, taga Barangay Odiong, lungsod sa Moises Padilla, Negros Occidental.
Si Jonathan Flores Tumulak, hepe sa City of Talisay Traffic Operations and Development Authority (CT-TODA), nisaysay sa Superbalita Cebu nga ang duha ka mga oil tanker nag-deliver og gasolina sa dakbayan sa Mandaue ug padulong na mopauli sa ilang base sa Negros.
Matod ni Tumulak, ang biktima nagsunod sa kaubang tanker nga gimaneho ni Glenn Gersin, 40, minyo, taga Barangay Himaya, lungsod sa Hinigaran, Negros Occidental.
Dugang ni Tumulak nga nakita sa CCTV camera footage nga pag-abot sa eskina sa maong dapit, stop signal ang siga sa traffic light.
Mao kini hinungdan nga si Gersin nihunong ug si Alvior usab, apan niikis-ikis ang iyang gimanehong tanker tungod sa kadangog sa karsada human sa uwan ug nibangga ngadto sa gisundan nga tanker.
Sa kakusog sa impact, ang tanker nga gimaneho ni Alvior nisarasay ug nibangga sa koral sa Carmen Village.
Si Alvior daling gidala sa South Medical Center apan gideklarar nga dead on arrival (DOA).
Matod ni Tumulak, maayo kay wala nay su’d ang duha ka mga tanker busa nakalikay sa dakong risgo sa pagbuto tungod sa flammable nga gasolina.
Gamay ra ang angol ni Alvior, matod sa kapulisan, busa gituohan nga cardiac arrest ang iyang namatyan.