Nakabsan sa kinabuhi ang usa ka lalaki nga nagmaneho sa iyang motorsiklo nga nidasmag sa gutter sa dan duol sa Gate 4 sa Mez, ML Quezon national highway, Barangay Ibo, dakbayan sa Lapu-Lapu, alas 12:10 sa tungang gabii sa Lunes, Abril 15, 2024.
Ang biktima giila nga si Neil Saruelo Agudo, 27, taga Brgy. Tigbawan, lungsod sa Tabuelan, amihanan sa Lalawigan sa Sugbo.
Sa pasiunang imbestigasyon ni P/Master Sgt. Christmar B. Lim, traffic police investigator sa Lapu-Lapu City Police Office (LCPO), nahibaw-an sa Superbalita Cebu nga ang biktima nagmaniho sa iyang motorsiklo nga nitadlas gikan sa Brgy. Buaya padung sa Barangay Pusok.
Apan gidudahan sa kapulisan nga nakatagpilaw ang biktima samtang nagmaneho sa iyang motorsiklo mao nga nadasmag siya sa gutter sa karsada.
Matod pa nga sa kakusog sa impact sa pagkadasmag, ang biktima nabunal sa dan ug nakabaton og grabing kadaut sa iyang lawas.
Gidali siya sa pagdala sa mga rescuer ngadto sa LapuĀ-Lapu City District Hospital apan gideklarar nga dead on arrival (DOA) sa attending physician nga si Dr. Ian R. Abella. / DVG