Nadasmagan sa multicab: 1 patay, 1 angol

Argao.
Argao.Google Maps

Usa patay ug laing usa ang angol sa managhigala nga nadasmagan og Suzuki multicab sa national highway sa Sityo Labangon, Brgy. Tulic, lungsod sa Argao, alas 3:50 sa kaadlawon, Marso 24, 2024.

Subay sa imbestigasyon ni Police Cpl. Mark Anthony Dicdican ubos sa direktiba sa ilang hepe nga si Police Maj. Ivy Martin Bartolome, nasuta ang duha giingong nag-inagbayay nga naglakaw sa dapit.

Ang mga biktima mao si Nelson Sardido Pantojan, 42, minyo, construction worker ug taga Barangay Calagasan, Argao, gideklarar nga dead on arrival (DOA) sa ospital ug si Marlon Lamban Legorio, 34, minyo, ug taga Brgy. Malabuyo, nakaangkon og grabeng angol.

Samtang, ang nagmaneho sa multicab mao si Ruel Artes Embrado, 60, minyo, ug taga Soplanza, Cambangyao, lungsod sa Dalaguete.

Matod sa desk officer, naka­dawat sila og tawag sa command center bahin sa maong aksidente ug dali nila kining girespondihan.

Sa imbestigasyon ni Dicdican, nasuta nga ang mga biktima nakainom samtang nag­lakaw sa dan sa maong dapit dihang nadasmagan sa multicab.

Ang duha gipangdala sa Bogo Argao District Hospital ICKMH apan si Pantojan ang gideklarar nga DOA samtang si Legorio gibalhin sa usa ka tambalanan sa dakbayan sa Sugbo.

Sa pakighinabi sa Superbalita ngadto sa drayber sa multicab, kini nagkanayon nga gikan siya sa Brgy. Pasil sa siyudad sa Sugbo kay na­ngumpra og isda ug nagpa­dulong na siya sa merkado sa Dalaguete aron sa pagtumod sa mga isda.

Matod niya, nilihay siya sa mga libaong nga way klarong pasidaan sa dan sa Laba­ngon sa Tulic, Argao, wa dayon siya makabantay sa duha nga nag-agbayanay nga diha nagsubay sa tunga sa dan hinungdan nga iyang nadasmagan. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph