Usa ka lalaki ang gikatahong nagwara-wara og kutsilyo ug giingong gihan-an og dunggab ang mirespondi nga polis ang napusilan patay sa Brgy. Tabuc-tubig, Dumaguete City, Negros Oriental niadtong Huwebes, Agusto 8, 2024.
Ang maong lalaki nailhan sa pangalang Alejandro, 45, taga-Ayungon, Negros Oriental ug trabahante sa usa ka kan-anan.
Dunay nangayo og police assistance sa dihang matod pa nagwala si Alejandro nga may bitbit nga kutsilyo.
Giaghat si Alejandro sa mga nirespondeng polis nga motahan sa iyang kaugalingon, inay nga mopatuo giingong giatake na hinuon niini ang polis.
Hinungdan nga napusilan ang maong lalaki sa iyang wala nga bahin sa dughan.
Gidali sa pagdala sa tambalanan apan gideklarar nga dead-on-arrival, wa matino og unsay hinungdan nga nagwala si Alejandro. / DVG