Nagkalalis ug diriyot magbugno ang lider sa usa ka kandidato ug iyang silingan kay wala maapil sa lista nga makadawat og P600 gikan sa kandidato sa pagsiguro nga maoy pilion atol sa eleksyon karong Mayo 12, 2025.
Ang insedente nahitabo sa Sitio Balbuena, Barangay Inayawan, Dakbayan sa Sugbo pasado alas 10:00 sa buntag, Martes, Mayo 6, 2025.
Daghan sa mga silingan ni alyas Maria, hingkod, minyo, taga Sitio Kaluwasan ang giingong gipanglista ug nahatagan sa tag P600 gikan sa usa ka kandidato.
Si Maria nakadungog og tsismis nga apil siya sa gilista apan wala siya maapil sa hinatagay, hinungdan nga iyang gisukmatan si alyas Susan, hingkod, biyuda, lider sa kandidato nga giingong namalit og botos.
Gikasuko ni Maria nga wala siya maapil sa pagpangamang ug giingong wa siya iapil tungod kay ilado siya nga tua mosuporta sa kaatbang nga kandidato.
Base sa mga nakasaksi, hapit na magbugno ang duha apan dunay tanod sa Barangay Inayawan ang dali nga nipatunga aron sa paghilot sa maong kasungian.
Ang desk officer sa Barangay Peace and Safety Office (BPSO) sa Inayawan, Cesar Bas nikumpirmar nga gialarmahan sa ilang mga tanod ang nahitabong kaguliyang ug nasulbad ra sab kini.
Nag-viral ang post sa usa ka nitizen nga taga Inayawan kagahapon nga nagpahibalo nga dunay nagbugno tungod kay wala makadawat sa tag P600 nga pagpamalit og botos sa mga botante sa maong area.
Sa miaging semana, ang kandidato giingong nagsugod sa pagpanghatag og tag P100 ug gisundan kini sa miaging adlaw sa tag P600. Base sa pasalig sa ubang mga lider nga dunay ikatulong pagpangamang nga himuon sa dili pa ang adlaw sa eleksyon. / VLM