ANAA sa talandugon nga kahimtang ang 32-anyos nga babaye nga nakaangkon og samad pinusilan sa iyang nawong, base sa labing uwahi nga update nakuha sa Superbalita Cebu.
Nadala sa tambalanan ang biktima human gipusil sa riding in tandem niadtong alas 3:10 sa kaadlawon, Miyerkules, Hunyo 18, 2025, sa dalan P. Gullas, Tabu sa Banay, Barangay Santo Niño, Dakbayan sa Sugbo.
Ang biktima gitago sa pangalan nga Cristy, sidewalk vendor, taga Sitio Bato, Barangay Ermita, Dakbayan sa Sugbo apan kasamtangang nagtulganan sa usa ka inn nga nahimutang sa Brgy. Sto. Niño.
Samad sa nawong ug ibabaw nga bahin sa iyang walang kilay ang naangkon sa biktima nga nahagba sa gutter human sa hitabo.
Dali nga nirespondi sa mga polis nga nagpatrolya niadtong higayuna og nanawag sab gilayon og mga medical personnel sa City Disaster Risk Reduction and Management Office.
NAG-SCATTER
Butyag ni Police Lieutenant Colonel Maria Theresa Macatangay, deputy city director for operation sa Cebu City Police Office nga base sa imbestigasyon sa Waterfront Police Station gikan sa pamahayag sa mga saksi nga samtang nagduwa og scatter ang biktima sa sidewalk, adunay niabot nga motorsiklo nga gisakyan sa duha ka lalaki ug usa kanila ang nipusil sa biktima.
“Sa pagkahitabo daw base on the witness accounts, nagduwa ni siya sa sidewalk og kanang scatter… and then naa kunoy nag-ply nga duha ka motor maoy account sa mga witness, one of the onboard sa motorcycle maoy nipusil sa iyaha,” saysay ni Macatangay.
Dugang pa niya nga sa dihang gidala ang biktima sa emergency room sa CCMC, nakakuha ang mga personnel sa tambalanan og mga drug paraphernalia nga gipalup-itan sa iyang bra sama sa tooter ug tin foil.
Tulo ka mga anggulo ang gisubay sa kapulisan nga may kalabutan sa iyang pagka-sidewalk vendor, illegal drugs ug illegal gambling.
Lakip sab nga gisusi ang giingong usa ka commercial sex worker.
Usa sa nakaila ni Cristy nga si alyas Amy nibutyag sa Superbalita Cebu nga daghan ang nasuko sa biktima kay kon aduna siyay customer isip commercial sex worker, giingong iya kining kawatan ilabi na niadtong makatulog gumikan sa kahubog ug kalit lang mawala.
Adunay higayon nga giabangan siya sa usa ka lalaki ug sa dihang naa na sila sa lawak, gipangayo daan niini ang bayad apan kalit lang nga mosibat biyaan ang iyang customer.
Gawas sa iyang pagka-commercial sex worker, suguon sab si Cristy sa pagpalit og illegal nga drugas sa iyang customer aron ilang gamiton sa sulod sa kwarto human madawat ang kuwarta ug dili na kini mobalik sa lawak.
“Na, daghan na nasuko ana niya kay iya laging idagan ang kuwarta sa iyang customer, inig abot nila sa sulod pangayuan man niya daan og kuwarta 'nya wala pa sila magsugod iya man sibatan ang lalaki, mag-wild gud ang lalaki. Unya kusog sad na siya mosuyop.” saysay ni Amy.
Nakig-alayon na ang mga imbestigador sa mga establisamento sa dapit aron mokuha sa mga CCTV camera nga makatabang sa pagsulbad sa pagpamusil. /AYB