Nagbitay nga wala nay kinabuhi sa ilang kusina ang usa ka ulitawo sa dihang napalgan sa iyang kabanay niadtong alas 6:30 sa buntag, Martes, Agusto 5, 2025, sa Purok 2, Barangay Lambug, Lungsod sa Badian.
Giila ang namatay nga si Keir John Quijano, 22, tinun-an sa college. Base sa pasiunang imbestigasyon sa Badian Police Station, ang uyoan nga si Froilan Fontanilla maoy unang nakakita sa gidangatan sa iyang pag-umangkon.
Saysay sa uyoan nga alas 9:00 sa gabii, Lunes, Agusto 4, niuna siya og saka sa 2nd floor sa ilang panimalay aron matulog samtang nagpabilin si Quijano sa silong.
Pagkabuntag nikanaog si Froilan aron nga maghikay og pamahaw ug nakurat na lang siya nga maoy nisugat sa iyang panan-aw ang nagbitay niya nga pag-umangkon.
Dali niyang giputol ang pisi nga gihigot sa liog ug gidala sa tambalanan apan nakabsan sa iyang kinabuhi si Quijano.
NAG-SELFIE
Sa dihang giukay ang cellphone ni Quijano nakapadala kini og picture sa iyang ex-girlfriend pinaagi sa messenger.
Ang maong picture ni Quijano dunay higot ang liog ug nagbitbit og beer ug makita ang background sa ilang kusina.
Si Police Staff Sgt. Harold Braddy Legarde, imbestigador sa Badian Police Station nibutyag sa Superbalita Cebu nga wala silay pangalan sa ex-girlfriend kay bisan ang kabanay wala makaila.
Gawas lang sa impormasyon nga nagbase kini sa Mindanao.
Gihulagway nga dili tig-share si Quijano sa iyang personal o lovelife ug hilumon sab siya og personality.
Nagduda ang pamilya nga may kalabutan sa gugma ang hinungdan nga gikutlo ni Quijano ang iyang kinabuhi.
HOTLINE
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services. Mamahimong matawgan ang mga mental health professionals sa mobile number nga 0917-655-0023; pmhacebu1950@gmail.com, Lunes ngadto sa Biyernes, 8AM-5PM o tawag sa Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. /GPL